Framlag til torrent.is

 

Tilefni þessarar sendingar er að minna notendur á að aðstandendur vefsins eru enn að berjast fyrir því að lögbannið verði afnumið svo að vefurinn geti haldið áfram í óbreyttri mynd og koma með fréttir af málinu. Einnig viljum við minna notendur á þann kostnað sem hefur komið vegna málsins og biðjum við um þá sem geta að styrkja málstaðinn þar sem fé er af skornum skammti.

Í tilraun til þess að flytja skilaboðin á sem einfaldastan hátt var ákveðið að hafa hann í 'Spurt og svarað'-formi. Hver og einn getur þá einbeitt sér að því að lesa það sem hann hefur áhuga á.

Hverjir standa fyrir lögbanninu?
- Fjögur íslensk rétthafasamtök kröfðust lögbanns á starfrækslu torrent.is sem var síðan veitt 19. nóvember. Þau samtök eru SMÁÍS, STEF, Framleiðendafélagið SÍK og Félag Hljómplötuframleiðenda (FHF).

Hvað varð um gögnin?
- Gögnin sem tengjast vefnum torrent.is eru enn í okkar vörslu og á heilu og höldnu. Beiðni rétthafasamtakanna um haldlagningu tækjabúnaðs og gagna var hafnað af sýslumanni þegar lögbannsbeiðnin var tekin fyrir.

Hvenær verður lögbanninu aflétt?
- Þessi spurning er nokkuð erfið en aðallega er um tvo möguleika að ræða sem leiða til þess. Sá fyrsti er að rétthafasamtökin dragi málið til baka (sem er frekar ólíklegt) og hinn er að dómstólar staðfesti ekki lögbannið. Mikil von er um að dómstólar dæmi rétt og aflétti þessu rangláta lögbanni sem fyrst.

Hvar er málið statt núna?
- Héraðsdómur vísaði málinu frá þann 27. mars síðastliðinn en þeirri ákvörðun var áfrýjað til Hæstaréttar sem er núna að meðhöndla málið. Þar ákveður Hæstiréttur hvort hann vísi málinu aftur til héraðsdóms eða staðfesti frávísunina. Við teljum að það síðarnefnda sé líklegasta niðurstaðan.

Hvenær mun málinu ljúka?
- Því miður er ekki hægt að segja til um það en það gæti verið á hverjum degi sem Hæstiréttur kveður upp úrskurð. Hins vegar fer það eftir niðurstöðu Hæstaréttar hvort málið heldur áfram eða lýkur á þeirri stundu. Eftir að niðurstaðan er orðin ljós er hægt að meta gildi hennar.

Mun vefurinn vera opnaður aftur?
- Það er ætlunin að vefurinn verði opnaður aftur með óbreyttu fyrirkomulagi ef það er ekkert sem hindrar það. Hvort og hvenær það gerist fer eftir gengi málsins fyrir dómstólum.

Af hverju ætti mér ekki að vera sama hvernig málið fer?
- Sumum notendum er nákvæmlega sama um gengi málsins vegna þess að þeir eru komnir á annan vef. Í sannleika sagt eru aðstandendur þessara vefja ekki í málaferlum núna því rétthafasamtökin vilja fyrst sjá hvernig Istorrent-málið fer áður en farið er í aðra aðila. Gengi Istorrent-málsins mun því hafa áhrif á aðgerðir þeirra í nánustu framtíð. Einnig er mikilvægt að aðstandendum slíkra vefja finnist að þeir hafi ríkan stuðning notenda, annars er mjög efasamt að fólk nenni að standa í því að berjast fyrir aðra í framtíðinni ef þeim finnst að almenningur yfirgefi sig um leið og til vandræða kemur. Málstaður lifir ekki nema hann hafi marga að baki sér.

Að grunni séð, um hvað snýst málið?
- Málið snýst um frjáls skráarskipti og einnig, þótt ótrúlegt sé, um frelsi Internetsins á Íslandi. Það síðarnefnda er ekki bein afleiðing málsins en væri skref í átt að frelsisskerðingu. Rétthafasamtökin vilja hafa sem mesta stjórn á dreifingu efnis en gleyma oft, eða hunsa, þátt almennings í höfundarrétti. Þau skilaboð sem væri verið að flytja með sakfellingu fyrir rekstur vefsins væru þau að þriðji aðili ber ábyrgð á aðgerðum notenda þess sem brjóta á höfundarrétti. Ef hýsingaraðilinn væri gerður ábyrgur fyrir mögulegum brotum notenda myndu fáir þora að setja upp t.d. myndahýsingar eða hýsa spjallborð.

Hver greiðir lögfræðikostnaðinn?
- Allur kostnaður er greiddur sameiginlega af Istorrent ehf. og Svavari Kjarrval. Jafnvel þótt málið vinnist er ljóst að upphæðin sem rétthafasamtökin þurfa að greiða í málskostnað mun eingöngu nægja til að greiða hluta af þeim raunverulega kostnaði sem lagt hefur verið í vörnina. Fyrir héraðsdómi voru rétthafasamtökin eingöngu skikkuð til að greiða 1/7 af heildarupphæðinni en miðað við 3,5 milljóna lögfræðikostnaðinn er ljóst að það mun mikið vanta upp á þegar málinu loksins lýkur. Hvorugur þessara aðila á mikla peninga svo framtíð þeirra byggist á stuðningi notenda og hvernig það fer fyrir dómstólum.

Ég vil styrkja baráttuna, hvernig get ég gert það?
- Þeir sem vilja styrkja með peningagjöf geta lagt inn einhverja upphæð á reikning 0135-26-072153 kt. 670807-2150. Einnig er hægt að styrkja útgáfuna með því að safna stuðningi meðal almennings.

Hvar get ég fræðst meira um málið?
- Blogg Istorrents á http://blog.istorrent.is mun halda áfram að veita fréttir og tíðindi af málinu en það er einnig aðgengilegt með því að slá inn torrent.is. Þar að auki er í boði fyrir alla að gerast áskrifendur að RSS fæði bloggsins. Einnig eiga fréttamiðlar það til að veita upplýsingar um málið.

ínnur atriði sem stjórnendur eru oft spurðir út í:
* Istorrent og stjórnendur þess standa ekki fyrir torrent-síðunni The Viking Bay (http://thevikingbay.org).
* Ef það verður afgangur af söfnuninni verður hann settur til hliðar og notaður til að verjast málsóknum í framtíðinni.
* Þegar vefur Istorrents opnar aftur munu allir aðgangar notenda vera til staðar ásamt því sem hver notandi hefur unnið sér inn.

Fyrir hönd Istorrents,
Svavar Kjarrval